ପୁରୀ ହତ୍ୟାକାଣ୍ଡରେ ଭଣଜାକୁ ହତ୍ୟା କରିଥିଲା ସମ୍ପର୍କୀୟ ମାମୁଁ

ପାରିବାରିକ କଳହ ଓ ପୂର୍ବ ଶତ୍ରୁତାକୁ କେନ୍ଦ୍ରକରି ଗତକାଲି ଭଣଜାକୁ ହତ୍ୟା କରିଥିଲା ସମ୍ପର୍କୀୟ ମାମୁଁ। ପୁରୀ ନରେନ୍ଦ୍ର କୋଣ ଜଟିଆ ବାବାଜୀ ଛକରେ ଲଡ଼ୁ ନାୟକ ହତ୍ୟାକାଣ୍ଡ ଘଟଣାର ପର୍ଦ୍ଧାଫାଶ କରିଛି କୁମ୍ଭାରପଡ଼ା ଥାନା ପୋଲିସ। ପାରିବାରିକ କଳହ ଓ ପୂର୍ବ ଶତ୍ରୁତାକୁ କେନ୍ଦ୍ରକରି ଏହି ହତ୍ୟାକାଣ୍ଡ ଘଟିଥିବା ବେଳେ ଅଭିଯୁକ୍ତ ସମ୍ପର୍କୀୟ ମାମୁଁ ଓ ତା ପୁଅକୁ କୁମ୍ଭାରପଡ଼ା ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି। ଗିରଫ ଦୁଇ ଅଭିଯୁକ୍ତ ହେଉଛନ୍ତି ହରିଜନ ବସ୍ତିର ଗଙ୍ଗା ନାୟକ ଓ ସୁନ୍ଦନ ନାୟକ। ଗତକାଲି ବିଳମ୍ବିତ ରାତିରେ ଏହି ଦୁଇ ଅଭିଯୁକ୍ତଙ୍କୁ ପୋଲିସର ଏକ ଟିମ୍ ଗିରଫ କରିଥିଲା। ହତ୍ୟାକାଣ୍ଡରେ ବ୍ୟବହୃତ ହୋଇଥିବା ଗୋଟିଏ ଲୁହା ରଡ୍ ଓ ଚିମୁଟା ଜବତ କରିଛି ପୋଲିସ। ତେବେ ହତ୍ୟାକାଣ୍ଡରେ ସମ୍ପୃକ୍ତ ଥିବା ଗଙ୍ଗାର ଆଉଜଣେ ପୁଅ ଅଭିଯୁକ୍ତ ଛଚି ନାୟକ ଏବେବି ଫେରାର ଅଛି। ଅଭିଯୁକ୍ତ ଛଚିକୁ ଧରିବା ପାଇଁ ପୋଲିସର ଏକ ଟିମ୍ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି। ପୁରୀ କୁମ୍ଭାରପଡ଼ା ଥାନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସିଟି ଡିଏସପି ପ୍ରଶାନ୍ତ କୁମାର ସାହୁ ଏନେଇ ସୂଚନା ଦେଇଛନ୍ତି।